اولدوزلار چیراغیم دیر
بولود، آغ پاپاغیم دیر
دایاندیغیم کیمسه یوخ
الیم دیر ،آیاغیم دیر
ulduzlar çirağimdir
bulud ağpapağimdir
dayandiğim kimsə yox
əlimdir,ayağimdir

دونیا بیر باتاق ،نه دیر ؟
بیر قارادوستاق ،نه دیر ؟
درد،عذاب،هیجران،اؤلوم
سن سیز یاشاماق نه دیر ؟
dünya bir bataq, nədir ?
bir qara dustaq, nədir ?
dərd,əzab,hicran,ölüm
sənsiz yaşamaq nədir ?

یار گئدیب،گئنه گلر
قاییدیب منه گلر
بو سؤز ضرب المثل دیر
سَنین کی سَنَه گلر
yar gedib,gənə gələr
Qayidib mənə gələr
bu söz zərbi-məsəldir
səninki sənə gələr

دونیانین گؤل،باغی سن
سئوگینین دایاغی سن
گؤیدَ ه کی اولدوزلارین
لاپ گؤزل پارلاغی سن
dünyanin gül,baği sən
sevginin dayaği sən
göydəki ulduzlarin
lap gözəl parlaği sən

قودوق،ائششک،آت ایچین
بیر پارا،مانات ایچین
اینسان درد،عذاب چکیر
موتلو بیر حیات ایچین
qoduq,eşsək,at için
bir para,manat için
insan dərd,əzab çəkir
mutlu bir həyat için

عاشیق یوخ،فاسیق گلر
میللته لاییق گلر
قارانلیقلاردان سورا
گئنه قارانلیق گلر
aşiq yox,fasiq gələr
millətə layiq gələr
qaranliqlardan sora
gənə qaranliq gələr

سو ایچمَه هر بولاغدان
گؤل دَرمَه هر یاناغدان
داغدان دوش، دَره دَه اؤل
آسلانما هر بوداغدان
su içmə hər bulaqdan
gül dərmə hər yanaqdan
dağdan düş dərədə öl
aslanma hər budaqdan

ایشسیز آدام ایش ایستر
دیشسیز آدام،دیش ایستر 
شهرین موللاسی اؤلوم
اکینچی یاغیش ایستر
işsiz adam iş istər
dişsiz adam diş istər
şəhərin mollasi ölüm
əkinçi yağiş istər

گؤزوم قالیب دیر سنده
سئویرَم سَنی منده
دونیا گؤزومدَن دوشدو
سَنَه گؤزوم دوشندَه
gözüm qalibdir səndə
sevirəm səni məndə
dünya gözümdən düsdü
sənə gözüm düşəndə

یوخدور آغلایانیمیز
قورد اولوب،چوبانیمیز
بیزلر بیر اسیریک کی
اؤلوب زیندانبانیمیز
yoxdur ağlayanimiz
qurd olub çobanimiz 
bizlər bir əsirik ki
ölüb zindanbanımız