ظولمت دی، قارانلیق دی، سحر،صبح اولماز
صوبحین باشینی غصّه کَسَر،صبح اولماز
بوز باغلایاجاق گؤزوم، حیاتیم،گونشیم
حسرت دولو سن سیز گئجه لر صبح اولماز

داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شّهَر کیمین داغیلمیشدیم من
آباد ائله دی عشق منی ساغ اولسون

وئردین گؤزل ایّام منه،عشق اولسون
دونیادا سنینله گزنه عشق اولسون
سندن دی حایاتیم،نفسیم،هرزادیم
ای جانیمیز ای عشق،سنه عشق اولسون

درک ائیله،اوتان،گئتمه،بوراخما بیزی سن
بیر لحظه،بیر آن،گئتمه،بوراخما بیزی سن
سن سیز بو حایات نه دیر؟ :جهنم چیچگی
ای عشق دایان،گئتمه،بوراخما بیزی سن

الدَن وئریب عاغلینی،دلی مجنون دور
فرهاد کیمین،کَرَم کیمین وورغون دور
هرکس سنین آماجین اولوب، گؤزلرینه
ایستی دوداغین،یئریکله ین قورشون دور

سندن سورا یوخ اولدوز،ایشیق قلبیمده
قار،قیش دی،قارانلیق دی قیریق قلبیمده
سن سیز چوخ آغیر دی،زندگانلیق آجی دیر
اود توتموش و قارماقاریشیق قلبیمده

قلبیم سَنَه،او گؤزلرینَه وورغون دور
سَن سیز بو جهان فایده سیز،دورغون دور
عشق اولماسا بیر تونل کیمین دیر دونیا
قاپ قارا،قارانلیق دی،تِرن یورغون دور

قلبیم سَنَه،او گؤزلرینَه وورغون دور
سَن سیز بو جهان فایده سیز،دورغون دور
عشق اولماسا بیر تونل کیمین دیر دونیا
قاپ قارا،قارانلیق دی،تِرن یورغون دور

سَم توکدو یئمَک، آشیما سَندَن سونرا
خَط چَکدی قلم-قاشیما سَندَن سونرا
کؤهنَه فلکین سینیق- سؤکوک چرخیندَن 
داش یاغدی سینیق باشیما سَندَن سونرا

تاثیر یوخو نفس ده بوردا سن سیز
مین عاشق اؤلوب هوس ده بوردا سن سیز
یول باغلی،دومانلی ، لاپ اومودوم اوزولوب
هی آه چکیرم قفس ده بوردا سن سیز