بیر توخ آدام، آجی گؤرسون
درد چکمز، غم-غصّه یئمز
آج آدامی درک ائله مز
اوتانماز، اؤلمَز، اریمز

اوروج توتوب، ناماز قیلار
بوینو ائششک بوینو کیمین
میللتی لاپ دین سیز بیلر
اؤزونو، مؤمن،  اهل دین

مسجدلره هئچ کیم گئدمیر
بوشالیب دای هئچ واخت دولماز
قدیم کیلر دؤز دئیب لر
آج قاریندا ایمان اولماز

قاراقیش دیر،میللت اؤلور آجیندان
سوفره لَردَه تویوق،اَت دَن خبر یوخ
قار یئرینه زَهَر یاغیر فلک دَن
سو-چؤرَک دَن،بال-شربت دَن خبر یوخ

یاییلیب دیر جهالت ویروس کیمین
غارت ائدیر چین میللتی روس کیمین
سؤنوب چیراغین نورو فانوس کیمین
دوزگون لوک دَن،شرافت دَن خبر یوخ

انصاف کؤچوب،شرف چکلیب دارا
اینسانلیغین بدنی پاراپارا
اللر بوش دور،گؤزلر یاشلی،گون قارا
اینسانلیغدان،عدالت دَن خبر یوخ

قربان اولوم آللاها
هر زادی پیس یاراتدی
آج آدامی وورماغا
گزمه،پلیس یاراتدی 

دئدی دوز آدام اولون
بهشته اعزام اولون
شراب اولدو،جام اولون
سونرا ابلیس یاراتدی !

قورخمادی آغ- قارادان
اوتانمادی یارادان
افغانستان یارادان
لندن،پاریس یاراتدی

            الیم بوش دورمنیم چوخ دور خیا لیم

           یامان دور وضع مالیم،هم دَه حا لیم

            غمیم دَن آغلا ییر نازلی عیا لیم

            اوشاقلاردا یوخو شام نئیلیییم من؟

                                           خدایا گلدی بایرام نئیلییوم من؟

            «حمیدین» تومّانین بندی قیریق دیر!

            «رضانین» باشماغی یِیرتیق،جیریق د یر !

            بیزیم ائودَه آجیندان قیشقیریق دیر!

               بوگوندَه اولدو آخشام نئیلییوم من؟

                                           خدایا گلدی بایرام نئیلییوم من؟

             منی کارخانا دان آتدی ایشیگه

              رئیسم،چیخد یم ایشدن بیرتپیگه!

             منی تشبیه ائدیب قونشوم پیشیگه!

              پیشیگ اولدوم سرانجا م نئیلییم من؟

                                           خدایا گلدی بایرام نئیلییوم من؟

         یوخومدور پول پسته،پول آجیل

          سیچانا اولموشام بو آی دا تبدیل !

         دوروب گلسَه بیزه بایرامدا فامیل

            الیم بوش دور بو ایّام نئیلییوم من؟

                                           خدا یاگلدی بایرام نیلییوم من؟

               غنی نین ایتلری توخوخدور حسابی!

                   چکیرلرهئی اوخا پیشمیش کبابی!

                  منیم قارنیم چکیر رنج وعذابی

                  یوخومدور پول حمّام نئیلییوم من؟

                                              خدا یاگلدی بایرام نئیلییوم من؟

             گلیربایرام اوره گیم قان د یرآمما!

            گؤزوم یاشلاندی دولدو« داملا داملا»!

                   گئدیب قیزلاریلان آنتالیادا

             غنی اوینور«دارادام» نئیلییوم من؟

                                           خدایاگلد ی بایام نئیلییوم من؟

             الیم بَند اولمادی بیرصندلی یَه

             بدهکار اولوموشام«مشد ی ولی»یَه!

             قیا فَه م اوخشاییر«مجنون » دلی یَه!

                             منی ترک ائتدی«لیلا»م نئیلییوم من ؟

                                   خدایا گلدی بایام نئیلییوم من؟

اوشاغلاری قوجاغلاما آی کیشی !

یاپیشما اونلارا فشاروئرمَه هی !

تؤکلرینی داراغلاما آی کیشی !

بیر یامان انسان،مذهبین دوشمنی !

آداملیغیدان چیخیب چوخ مبتدل سن !

قرآن اوخویاندا عَمَل دَه ائیله

نه دَن اولوب عالم ِ بی عمل سَن !

شک یوخومدور بودونیادا تاپیلماز

سنین کیمین کافرین مذهبینده !

یقین دی کی درس اوخویوب سان گؤزل

اوشاغلیغداقزوینین مکتبینده !!

ای خوش او گونلر کی بیز آزادیدیک 
پول واریدی،قیزلارینان شادیدیک !
صاحب سرمایه و هر زادیدیک !
گونلریمیز شادیدی،آرامیدی !
    « آخ نئجه کئف چکملی ایّامید ی»

یوخلوق الیندَن یوخودو هئچ گله !
شاکی دگیلدی آج آدام بیر بئله !
ائـتدی حرام مال بیزی لاپ حامله !
آخماق آدام غرق در اوهامیدی !
        «آخ نئجه کئف چکملی ایّامیدی»

بیزلر ائلردیک هامی وقت اختلاس 
ملتمیزده یوخودو هئچ حواس !
قؤزامیشیق دؤرت کامیون اسکناس !
آفتابه اوغرولاری بد نامیدی !
        «آخ نئجه کئف چکملی ایّامیدی»

جامعه ده ظاهریمیز چوخ گؤزل
باطنمیز ساحه سی،چیرکین،دغل !
اوغرو آداملار ، هامی میز مبتذل !
ساققالیمیز مظهر اسلامید ی !
        «آخ نئجه کئف چکملی ایّامیدی»


قاچدیق اگر هر بیریمیز بیر یانا !
گلدی قدَر دولتیمیز میدانا !
دوتدی بیزی ایندی سالوب زیندانا !
کِئشگه بیزیم دولتیمیز خامیدی !
        «آخ نئجه کئف چکملی ایّامیدی»

ائششکلردن پالانلاری

یالان سؤزلر ساتانلاری

مؤفتَه یئیب یاتانلاری

"اوغورلاماق ایسته ییرم"

اویرنجینی،اؤیرتمنی

نقشه اؤستوندن وطنی

داغلارین اؤستوندَن چَنی

"اوغورلاماق ایسته ییرم"

غوصّه لری،کدَرلری

یالان یالان خبرلری

قضالاری،قدَرلری

"اوغورلاماق ایسته ییرم"

آغیزلاردان نوختالاری

اورکلردَن شاختالاری

آخماقلرای،آختالاری

"اوغورلاماق ایسته ییرم"

پیس شی لر گؤرَن گؤزومو

اثر سیر شعریم،سؤزومو

یالان دونیادان اؤزومو

"اوغورلاماق ایسته ییرم"

«حاجی رجب» ثروتین دریاسی دیر !
شهریمیزین اَن بویوک شوراسی دیر !
شورا اولماق اونون تمناسی دیر !
ناماز قیلماز،گونده گئدر نامازا !

چؤ دوشوبدور ریانی ترک ائدیبدیر !
شهرداریلان اروپایا گئدیبدیر !
بودوره بئش یوز میلیون وئریبدیر!
بیر هفته لیگ توتوبدور بیر مغازا !

تبلیغ ائدیر دووارلاردا اؤزونو 
قازئت لرده یازیب یالان سؤزونو

چیخاردیرلار رقیب لری گؤزونو
دئیرلر : رای وئرمه یین حقه بازا !

ائشیدمیشم دئییبدیر : آی جماعت !
ایسته ییرم سیزدَن ائدیم حمایت 
هی ائدیرم رقیبلن رقابت 
خدمت ائدیم سیزلره تازا تازا !

یالان دئییر هئچ کیمسه دَن اوتانمیر 
یالان دئمیر ،دگیرمانی دولانمیر 
قارقیشلانیب آمما نیه اوزانمیر ؟!
موفته خیارلاری سوخور بوغازا !!

دئییرکی : من اوزالدارام بوی لاری !
قیز - اوغلانا چوخالدارام توی لاری !
قورخمایین اصلاح ائدرم سوی لاری !
دوندَرَرَم تولکی،چاققالی غازا !!

قادر آلله سئل آپاریب هریانی

فرهاد شیرین،شیرین فرهاد اولوبدور

قاریشیبدیرار-آروادین آراسی

آرواد کیشی،کیشی ،آرواد اولوبدور

انسان اوغلو تعظیم ائدیرانسانا

وئریبدیر نوختاسین اوشاق-آروادا

تانیش اولوب کیشی،آرواد هر یادا

مملکتین ایشی برباد اولوبدور

قوران کیلاسینا دای گئتمیر اوشاق

اوشاق بوغدا اولوب،اؤیرتمن اوراق

آق قارادیر،دؤز باخاسان  قار اآق

قوران اؤیرتمنی شیّاد اولوبدور

ایشیق کیمین بیزلره ساچدی گئتدی

باش توولاییب نوختاسین آچدی گئتدی

«کل اوغلانین» ائششگی قاچدی گئتدی

عرعرائدیر چونکی آزاد اولوبدور

نییه بواتفاق شوم دوشدو

نییه قازماق باداگئتدی قازان دان؟

خروزلاریوخلاییبلارکندیمیزده

نییه قارداش خبریوخدوراذان دان ؟

نییه میللت اولوب اوغرو،یالانچی

نییه یاددان چیخیب صلح وصداقت؟

نییه یالقیزدیلار دایم ار-آرواد؟

نییه افسانه دی عشق ومحبت ؟

نییه دونیادا بیرمجنون تاپیلمیر؟

نییه عاشق ده اصلا درد وغم یوخ ؟

نییه لیلی گورونموردوره میزده

نییه افسانه دی اصلی،کرم یوخ ؟

گونش چیخدی،گئنه ایستی اوجالدی

گئنه سئومک دن ای جان ائیله صحبت

اکینجی لراکیربوغدا گئنه سن

محبت اک،محبت اک،محبت