غم،غصّه نی سؤپورَر
دردی یئردَن گؤتورَر
سَن گل منی قوجاغلا
عشق اوز ایشینی گؤرَر
Qəm,qüssəni süpürər
Dərdi yerdən qötürər
Sən gəl məni qucaqla
Eşq öz işini görər

بیرَر بیرَر آپارار
باسیب،ازَر آپارار
هر جور یاپیشان سنی
تورپاق چکر آپارار
Birər birər aparar
Basib əzər aparar
Hər cur yapişsan səni
Torpaq çəkər aparar

دَردلَری ساتان منم
اومود سوز یاتان منم
دَنیزسیز شَهَرلردَه
گمیسی باتان منم
Dərdləri satan mənən
Umudsuz yatan mənəm
Dənizsiz şəhərlərdə
Gəmisi batan mənəm

قدرین بیلنی آختار
گولو،چمنی آختار
سنی سئومه ینلری
بوراخ سئونی آختار
Qədrin biləni axtar
Gölü,çəməni axtar
Səni sevmeyenleri
Burax, sevəni axtar

تک قویما آپار منی
یالقیزلیق آغلار منی
گئتمه،گئت سَن بیر آخشام
سَن سیزلیک بوغار منی
Tək qoyma apar məni
Yalqizliq ağlar məni
Getmə,getsen bir axşam
Sən sizlik boğar məni 

قوروموش کَهریز کیمین
بیر صاحب سیز ایز کیمین
چوخدان دیر کی اولموشام
دالغاسیز دنیز کیمین
Qurumuş kəhriz kimin
Bir sahipsiz iz kimin
Çoxdandir ki olmuşum
Dalgasız dəniz kimin

سئوینب ،آغلاماق دیر
بیر اؤپوش،بیر دوداق دیر
اوزاقلیق کفارّه سی
اؤزون قوجاقلاماق دیر
Sevenib,ağlamaq dir
Bir öpüş,bir qucaq dir
Uzaqliq kəfarəsi
Uzun qucaqlamaq dir

قیش اولسون،باهار اولسون
یاغیش اولسون،قار اولسون
بیر ایستی،بیر دار قوجاق
شراب اولسون،یار اولسون
Qiş olsun,bahar olsun
Yağiş olsun.qar olsun
Bir isti,bir dar qucaq
Şarab olsun,yar olsun

روحوم سولماز،سارالماز
غم کونلومدان باج آلماز
بیر گون یوخودان دوررام
گوزوم یولوندا قالماز
Ruhum solmaz,saralmaz
Qem kunlumdan bac almaz
Bir gün yoxudan durram
Gözüm yolunda qalmaz

اوپوش،می یاساق دئییل
نغمه،نی،یاساق دئییل
چونکو قانون سوزلوق دور
هئچ‌ بیر شئی یاساق دئییل
Öpüş,mey yasak değil
Nəğmə,ney yasak değil
Çünkü kanunsuzlukdur
Hiç bir şey yasak değil