الیندن قاچار گئدر
ایشیق تک ساچار گئدر
گنجلیک بیر بالا قوشدور
توتماسان اوچار گئدر
əlindən qaçar gedər
işiq tək saçar gedər
genclik bir bala quşdur
tutmasan uçar gedər

اوزاق یوخ،یانیمدادیر
قلبیمده،قانیمدادیر
جانیمی یاخانلارین
هامیسی جانیمدادیر
uzaq yox,yanimdadir
qəlbimdə,qanimdadir
canimi yaxanlarin
hamisi canimdadir

اولدوزلار چیراغیم دیر
بولود، آغ پاپاغیم دیر
دایاندیغیم کیمسه یوخ
الیم دیر ،آیاغیم دیر
ulduzlar çirağimdir
bulud ağpapağimdir
dayandiğim kimsə yox
əlimdir,ayağimdir

یار گئدیب،گئنه گلر
قاییدیب منه گلر
بو سؤز ضرب المثل دیر
سَنین کی سَنَه گلر
yar gedib,gənə gələr
Qayidib mənə gələr
bu söz zərbi-məsəldir
səninki sənə gələr

دونیانین گؤل،باغی سن
سئوگینین دایاغی سن
گؤیدَ ه کی اولدوزلارین
لاپ گؤزل پارلاغی سن
dünyanin gül,baği sən
sevginin dayaği sən
göydəki ulduzlarin
lap gözəl parlaği sən

سو ایچمَه هر بولاغدان
گؤل دَرمَه هر یاناغدان
داغدان دوش، دَره دَه اؤل
آسلانما هر بوداغدان
su içmə hər bulaqdan
gül dərmə hər yanaqdan
dağdan düş dərədə öl
aslanma hər budaqdan

هئچ فیکر ائله مَز،علم و ساوادی چوخدور
یونجاسی،سامانی،هامی زادی چوخدور
بیر کیمسَه دئدی : خطرلی اینسان کیمیدیر ؟ 
او ائششک آدام کی اعتقادی چوخدور
heç fikr eləməz,elm o savadi çoxdur
yoncasi,samani,hamizadi çoxdur
bir kimsə dedi:xətərli insan kimdir?
O eşşək adam ki etiqadi çoxdur

گؤزوم قالیب دیر سنده
سئویرَم سَنی منده
دونیا گؤزومدَن دوشدو
سَنَه گؤزوم دوشندَه
gözüm qalibdir səndə
sevirəm səni məndə
dünya gözümdən düsdü
sənə gözüm düşəndə

یوخدور آغلایانیمیز
قورد اولوب،چوبانیمیز
بیزلر بیر اسیریک کی
اؤلوب زیندانبانیمیز
yoxdur ağlayanimiz
qurd olub çobanimiz 
bizlər bir əsirik ki
ölüb zindanbanımız

کیم دئییب دایاق اولار
گوز،آغیز،قولاق اولار ؟
گوز ده اولمایان آدام
کونول دن اوزاق اولار
kim deyib dayaq olar 
göz,ağız qulaq olar
gözdə olmayan adam 
könüldən uzaq olar