اوزگونم عاشیق کیمین
یالنیزام قاییق کیمین
بو دونیادا قالمیشام
بیر اسیر بالیق کیمین
üzgünəm aşiq kimin
Yalnızam qaeiq kimin
Bu dünyada qalmişam
Bir əsir baliq kimin

دونیایا اینک کیمین گلیب غاز کئچمَمم
میخانا آچیق اولسا،اورا آز کئچمَم
میخانا،شراب و سازدان،ساقی دان
هر کیمسه منی منع ائله سین واز کئچمَم

هرگز گؤتو بوش شیخ خجالت چکمز
یاتماق دی،یئمک دیر ایشی زحمت چکمز
بیر گؤن سوخاجاق دولته میللت،دئمَه سَن
پیس جور سوخوب میللته دولت چکمز

باغی،بولاغی یوخدور
دَرَه سی،داغی یوخدور
بوگونلر سَن سیزلیگین
اوجو-بوجاغی یوخدور
Baği,bulaği yoxdur
Dərəsi,daği yoxdur
Bugünlər sənsizliğin
Ucu-bucaği yoxdur

بو سؤز یول دور،یولاق دیر
آداملارا دایاق دیر
ائششکلیک: کیف ائله مَک
آنلاماق،آغلاماق دیر
Bu söz yoldur,yolqdir
Adamlara dayaqdir
Eşşəklik:kef eləmək
Anlamaq,ağlamaqdir

قوجا دیر،دیش یوخودور
بئکار دیر،ایش یوخودور
سوروشسان : "حایات نه دیر ؟"
قاریشمیش بیر یوخودور
Qocadir,dış yoxudur
Bekardir iş yoxudur
Soruşsan hayat nədir?"
Qarişmiş bir yuxudur

سحر یوخودان دوردوم
خارجَه قاچماق ایچین
بیر گؤزَل،یئنی قاپی
اوزومه آچماق ایچین

گؤردوم اَل چَکَه بیلمَم
ائویمدَن،وَطنیمدَن
وطنین عشقی چیخماز
روحومدان،بَدنیمدَن

آلداتدیم هی اؤزومو
دئدیم آزادلیق گَلر
بیرگون بیزیم اولکه یَه
راحاتلیق،شادلیق گَلر

درد،آجی، عذاب چَکیب
عؤمور بویو یورودوم
یورغون،پوزغون وطن دَه
قالدیم،اؤلدوم،چورودوم
Səhər yuxudan durdum
Xaricə qaçmaq için
Bir gözəl,yeni qapi
Üzümə açmaq için

Gördüm əl çəkə bilməm
Evimdən,vətənimdən
Vətənin eşqi çıxmaz
Ruhumdan,bədənimdən

Aldatdim hı özümü
Dedim azadliq gələr
Bir gün bizim ölkəyə
Rahatlıq,şadliq gələr

Dərd,acı,əzab çəkib
Ömür büyü yürüdüm
Yorğun,pozğun vətəndə
Qaldim,öldüm,çürüdüm

یاغیش اولدو باغیما
دایاق اولدو داغیما
بیر باخیشین جان وئردی
قوروموش توپراغیما
Yağiş oldu bağıma
Dayaq oldu dağima
Bir baxişin can verdi
Qurumuş toprağıma

ای بادا گئدیب جلالی صبر ائت صبر ائت
داغ- داش،مئشه نین مارالی صبر  ائت،صبر ائت
مرهم اولاجاق دردلرینه اؤزگورلوک
ای قلبی درین یارالی صبر ائت،صبر ائت

قیشدا اؤز آتشین اول
خرمنین،کولَشین اول
لاپ قارانلیق گونلَرده
پارلایان گونَشین اول
Qışda öz atəşin ol
Xırmanın,küləşın ol
Lap Qaranlıq günlərdə
Parlayan günəşin ol