جۆجه،تۏیۇق،رانا اَلیم چاتمادی !

دلبر جانانا اَلیم چاتمادی!

رشوه نی وئردیم گؤزل افسرلره!

چۆنکۆ گرۇهبانا الیم چاتمادی!

لۆت گزیرم کۆچه ده مجنون کیمین !

بیر پارا تومّانا اَلیم چاتمادی !

تۇتدۇم اۏرۇج،کعبه ده قیلدیم ناماز !

آللاها،ایمانا اَلیم چاتمادی!

میزی سئون حاکمی گئتدیم گؤرۆم

قاپییا، دربانا اَلیم چاتمادی !

گلدی یۇخۇما «حاجی اکبر » دئدی :

« حوریا،قیلمانا اَلیم چاتمادی »

سن هله مین مۆفته «پرادو»لاری

دنده یه،فرمانا اَلیم چاتمادی!

شیطانا درس اؤیره‌دیرسن،هئی دئمه

ایزد سبحانا الیم چاتمادی !

سۆفره قیراغیندا اۏتۇردۇم ، ولی

قیمه ، فیسنجانا الیم چاتمادی !

دیش وئریب آرپا چورگین وئرمَدی

صاحب دندانا اَلیم چاتمادی !

قیسمتم اۏلدۇ قۇرۇ حسرت یئمَک

باغا ، گۆلستانا الیم چاتمادی !

تاکی سیزین وارلیقیزی یۆکله‌یم

پیکانا ، نیسانا اَلیم چاتمادی !

قۏیمادیلارکی اؤزۆمۆ اؤلدۆرۆم

نقطه ی پایانا اَلیم چاتمادی

بیر قادین ائتدی شکایت قاضییَه

تا بوشانسین بلکه تئز گئتسین اَره

باشینا چکمیشدی بیر آغ چارشابی

گؤرسه نیردی گؤزلری پارلاق ، قَرَه

باخدی شورگؤز قاضییَه ،قاضی دئدی :

«قلبیمی آلدین آپاردین یکسره»!

دوتدو آرواد جانبین ، شرم ائتمه دی

حقی وئردی ظۆلمولَه اۏ دلبره

آنلادی بو ماجرانی اؤز اَری

چادرانی سالدی باشیندان یئره

گؤردو اۏ قاضی کی چیرکین دیر اۆزۆ

سؤیلَدی :منشی؛تئز اۏل؛یاز دفتره

«گؤزلرین مظلوم گؤزودور آی قادین

اوخشاییر آمما اۆزۆن ظالیم لَرَه

هئچ کیمَه حریف اولماز

هئچ زادی ردیف اولماز

کیشی الی بوش اولسا

خوار اولار شریف اولماز

عزیزیم یالان یاخشی

ملتی تالان یاخشی 

خالق اوستونه قویماغا
کتاندان پالان یاخشی

دیز چوکوم آیاغیندا
داغ سوکوم قاباغیندا
گل قوی بیرآزایسلانیم
یاغیشلی قوجاغیندا

عطرین یاغیر سحردَن

یادین اسیر خزدَن

سنین آدین گلندَه

شعریم دولور شکردَن

باهالاشیب چؤرکلر

چیرپینیبدیر اؤرکلر

ار-آرواد قهرائدیبلر

بوم بوش قالیب دؤشکلر!

داش"سنگ"اولار، پا"آیاق"

دال"عقب"، جلو"قاباق"

‏دؤولت تؤکۆر قبیره

میللتی قالاق قالاق

او گئجه شهر ایچِندَه       

غرق اولدون قهرایچِنده

دئدیم:«گؤزَل مارا لیم!   

عسل سن،زهر ایچِندَه»!

دئدیم ، یاز بیزدَن سورا
آزاولمازبیزدَن سورا
بو میللت ائششکلیگی
بوراخمازبیزدَن سورا