مؤمن لریله صؤحبت و جنگ ائیله مَه سَن

قاچ گَل، خومارام، هی منی لنگ ائیله مَه سَن

پالچیق اولاجاق مؤمن و کافر آخر

ساقی مَنَه وئر باده، درنگ ائیله مَه سَن

‏آغ بورانی، گلابی اولماز هرگیز

نوقصانلی آدام،حسابی اولماز هرگیز

مندَن ائشیت و قولاغینا سیرغا ائله

اوجوز اوزومون شرابی اولماز هرگیز

ağ boranı,gülabi olmaz hərgiz

nöqsanlı adam,hesabi olmaz hərgiz

məndən eşit o qulağına sırğa elə

ucuz üzümün şərabı olmaz hərgiz

عشق ائیله سین و همیشه جامی دولسون

توتدو الیمی ، قویمادی روحوم سولسون

دوندوردو سئوینجَه ،خوشلوغا پیس گونومو

هی توکدو شراب ،ساقیا عشق اولسون

ایگنه سی گؤزَه ،قلبیمزَه باتمازدی

کیرپی کیمی توخ، یوخسولا اوخ آتمازدی

بو دونیادا ذرّه جَه وفا اولسایدی

نوبت سَنَه و سونرا مَنَه چاتمازدی

گل مندَن ائشیت  قورخما اؤلوم، برزخ دَن

کئچ دونقوز، اینک ، قویون کیمین مسلخ دَن

اصلا نگران اولما ،چاخیر ایچ، کئف ائله

کیم گئتدی بهشته، کیم گلیب دوزخ دَن ؟!!

بو ملت اولوب بَتَر تالان ای ساقی

هر کیمسه دن آلداندی یامان ای ساقی

وئر باده نی چیخسین بو فیکیر بئینمیدن

غم دن اولورم گئتمه دایان ای ساقی

گؤردوم کی گئدیر او دلبر ِ هرجائی !

گؤز قویدوم اونا یاواش دئدیم :«می آئی »؟!

بیر دارکوچه دَه دؤندو منی هی سؤیدو

آتدی مَنه کور پیشیک کیمین دمپائی !!

گئج گلمَه،منی غوصه چاپار ای ساقی

مین بیر قودوق،ائششک و قاتار ای ساقی

گلدین منه بیر قازان چاخیر،وودکا گتیر

میندیر آتا دردیمی آپار ای ساقی

gec gəlmə məni qüssə çapar ey saqi

min bir qoduq, eşşək o qatar ey saqi

gəldin mənə bir qazan çaxır, vodka gətir

mindir ata dərdimi apar ey saqi