شیخ ایستیر گوزل اولسون

باش،آیاق،گوز،ال اولسون

آللاها رشوت وئریر

صاباحی گوزل اولسون

اوچماق چیخیب یادیمدان

درد یاغیر فریادیمدان

بیر توتساق گویرچینم

قان آخیر قانادیمدان

 غارته همت ائدیب،بئل باغلادی

چاپدی خالقی،چوخ اؤرکلرداغلادی

قوردایله هم سؤفره اؤلدو مش حسن
ال-بویون آمما چوبانلا آغلادی

قاچمیشام،هی دویده ام که مپرس

درد عشقی کشیده ام که مپرس

سیرتیق،اؤزلو،ادب سیز و گؤتوگئن
دلبری برگزیده ام که مپرس

ده ده می باندیریب،الیندن هی
می رود آب دیده ام که مپرس

کؤپک اوغلو،دله،گدا،اوندان
سخنانی شنیده ام که مپرس

گیزلی گیزلی سامانلیق،آمباردا
لب لعلی گزیده ام که مپرس

غصه لردن اوغول گؤتؤم جیریلیب
رنجهائی کشیده ام که مپرس

ساتمیشام حافظا آداملاری من
به مقامی رسیده ام که مپرس

سون باهار دیر توکولور یارپاغلار

اولدو کؤینک سیز آغاجلار،باغلار

بیر سویوق یئل اسَه جاق،لاپ اوشویَه ر

قارغالار،کورپو،بولاغلار،داغلار

گئنه دام-داش آغاریب،قار یاغاجاق

گئنه بوز باغلایاجاق اورتلاغلار

قیش گلیب جاجیمی نی تئز آچاجاق

گئنه یوللاری کؤلَک،قار باغلار

سئوگیلیم یادا سالیب گؤزلرینی

عاشقین قاردا اؤرَکدَن آغلار

هانی او ایستی قوجاق،دار کوچه لر؟

هانی او ایستی دوداغلار،چاغلار؟

قار ایچیندَه بیر اؤرَک رسم ائله ییب

سنین آدین یازاجاق بارماغلار

اثرائتمور داوالار

کسرسیزدیر دوعالار

باهالیق گوج گتیرسه

پارتلایاجاق گدالار !

ایستکلی گؤزل یوردوم،قزوینه سلام اولسون !

من فرهادام اوشیرین،شیرینه سلام اولسون

قزوینه سلام اولسون

تاکستانا،الونده،آبیکه وتاکنده

هرکوچه یَه،هرکنده،

هردینه سلام اولسون

قزوینه سلام اولسون!

اوغلان،کیشی آروادا

هرکیمسه یَه،هرزادا

گؤزیوردو ضیابادا

کاسیبلرینه،پوللو،مسکینه سلام اولسون

قزوینه سلام اولسون!

جنت دی قاقازانی

داغ- داشلاری،هریانی

دشتابی،بوئین زهرا

خوشحال آداما،یورغون، غمگینه سلام اولسون

قزوینه سلام اولسون!

باقلاواسی لاپ شیرین

پسته سی دَه  اعلادیر

لندن دی باراجینی

خیامی اروپادیر

هربیرخیابانینداوار پینه سلام اولسون !

قزوینه سلام اولسون

قزوینه سلام اولسون!

ایران ایَه تقسیم اولور،اولسون نه ایشین وار

هر کیمسَه یَه تقدیم اولور اولسون نه ایشین وار

مین ایل ایَه تحریم اولور اولسون نه ایشین وار

قیشقرما،بوراخ کاخیده راحت گئجه یاتسین
راضی دئییلم اوغرولاری کیمسَه اویاتسین
قوی سئوگیلینه چونکو قاچیب خارجه چاتسین
چاپسین یییَه سیز مملکتی اؤزگه یَه ساتسین
ایران ایَه تقسیم اولور اولسون نه ایشین وار
هر کیمسَه یَه تقدیم اولور اولسون نه ایشین وار

سالما یادا راحتلیغی و اسکی زامانی
ائششک کیمین ایشله،ائله مَه شکوه فلانی
سَپمَه باشینا هی قارا توپراغی،سامانی
چوخداندی بوتون سئل آپاریب یاخچی-یامانی
ایران ایَه تقسیم اولور اولسون نه ایشین وار 
هر کیمسَه یَه تقدیم اولور اولسون نه ایشین وار

ترک ائیله غم و غصّه نی و فکر و خیالی
فیکر ائیله کی اوضاع اولوب ایستَکلی و عالی
لطف ائیله بوراخ بحث و جدل،قال مقالی
آخیر سَنَه نه کی "دلار" اؤلدوردو "ریالی"
ایران ایَه تقسیم اولور اولسون نه ایشین وار
هر کیمسَه یَه تقدیم اولور اولسون نه ایشین وار

آغلاردی ائشیتدیم بو سؤزو "حاجی صفر"دَن
آجام اؤلورَم غصّه ایله درد کمردَن
یاندی اؤره ییم چونکو ائشیتدیم بو خبردَن:
ایرانین اوزولدو الی دریای خزردَن
ایران ایَه تقسیم اولور اولسون نه ایشین وار
هر کیمسَه یَه تقدیم اولور اولسون نه ایشین وار

مریضین ویزیت اولماز

یانلیشین ائدیت اولماز
گؤزله گوناه ائیله مه
گوناهین دیلیت اولماز

عومور بیر خوش باخیش دیر

بیر بولود،بیر یاغیش دیر

دئدین فلاکت نه دیر ؟

ایراندا یاشاییش دیر