داغلاری یاشیل و چوللری باغ اولسون
آغ دیر اوزوموز، اونون اوزو آغ اولسون
ویرانه شّهَر کیمین داغیلمیشدیم من
آباد ائله دی عشق منی ساغ اولسون

درک ائیله،اوتان،گئتمه،بوراخما بیزی سن
بیر لحظه،بیر آن،گئتمه،بوراخما بیزی سن
سن سیز بو حایات نه دیر؟ :جهنم چیچگی
ای عشق دایان،گئتمه،بوراخما بیزی سن

سندن سورا یوخ اولدوز،ایشیق قلبیمده
قار،قیش دی،قارانلیق دی قیریق قلبیمده
سن سیز چوخ آغیر دی،زندگانلیق آجی دیر
اود توتموش و قارماقاریشیق قلبیمده

تاثیر یوخو نفس ده بوردا سن سیز
مین عاشق اؤلوب هوس ده بوردا سن سیز
یول باغلی،دومانلی ، لاپ اومودوم اوزولوب
هی آه چکیرم قفس ده بوردا سن سیز

یوخدور مَنه ایستَک لی و  همدم سَن سیز
ای یار مَنی هلاک ائدَر غم سَن سیز
گؤز یاشیما، یالوارماغیما رحم ائله ، گل
دونیام اولاجاق زَهَر، جهنّم سَن سیز