آخماق، الی اگری میللتی شاد اولماز
دوستاقدا قالار همیشه،آزاد اولماز
هر اؤلکه نی تسخیر ائله سین ائششکلیک
ویران اولار او مملکت آباد اولماز

سن فیکر ائلمه داغین ایچینده یاشادیم
جنّت ده،بولاغ-باغین ایچینده یاشادیم
بیر عمر عذاب چکدیم و جان وئردیم
بیر عدّه قورومساغین ایچینده یاشادیم

ساغلام قوجادان، دوزگون ایگیددن ال چَک
پیس جور قاپی باغلانیب ،کلیددن ال چَک
ایراندی جهنم،یازیلیب تابلوسونا
گلدین بورا هر ایستَک،اومیددن ال چَک

دونیانی گره ک عاقل آدام کم توتسون 
ُسئوگیلی آلیب قوجاغا محکم توتسون 
چوخ بیلمیش آدام جام شرابین بئلینی
محکم توتا قویماز اوره یین غم توتسون

سو، برقه،پولا، اؤزگه یَه محتاج اولسون
گئتسین ایشه اوندان سورا اخراج اولسون
تا چاره سیز، آج میللتی درک ائله سین
آرزو ائدیرم کی شیخ ده آج اولسون

سو قاتما سودا،بو ساده خالغا ساتما

تولکو صیفت اولما ، یولوموزدا یاتما

ال چکمه میشیک هله بیز ائششک لیکدَن

ای شیخ یالان دئمه بیزی آلداتما !

مؤمن لریله صؤحبت و جنگ ائیله مَه سَن

قاچ گَل، خومارام، هی منی لنگ ائیله مَه سَن

پالچیق اولاجاق مؤمن و کافر آخر

ساقی مَنَه وئر باده، درنگ ائیله مَه سَن

‏آغ بورانی، گلابی اولماز هرگیز

نوقصانلی آدام،حسابی اولماز هرگیز

مندَن ائشیت و قولاغینا سیرغا ائله

اوجوز اوزومون شرابی اولماز هرگیز

ağ boranı,gülabi olmaz hərgiz

nöqsanlı adam,hesabi olmaz hərgiz

məndən eşit o qulağına sırğa elə

ucuz üzümün şərabı olmaz hərgiz

عشق ائیله سین و همیشه جامی دولسون

توتدو الیمی ، قویمادی روحوم سولسون

دوندوردو سئوینجَه ،خوشلوغا پیس گونومو

هی توکدو شراب ،ساقیا عشق اولسون